Murray, pasi Djokovic vuri në rrezik US Open: Amerika s’është Serbi apo Kroaci

Pasi ATP-ja vendosi t’i suspendojë të gjitha garat zyrtare të tenisit shkaku i përhapjes së Covid-19 në botë, Novak Djokovic e nisi një turne më 13 qershor në Beograd, që më pas u zhvendos në Zadar të Kroacisë, transmeton Express.

Tenistët Grigor Dimitrov, Borna Coric dhe Viktor Troiki të gjithë rezultuan pozitiv me Covid-19 gjatë fundjavës, ndërsa të njëjtin fat e pësoi edhe Novak Djokovic të martën.

Kjo ka bërë që planet për kthimin e garave zyrtare të tenisit në gusht të vihen në pikëpyetje, veçanërisht turneu US Open që planifikohej të nisë më 24 gusht. Por, Murray beson se turneu amerikan do të ketë mundësi të zhvillohet prapëseprapë.

“Disa njerëz kanë thënë që ndoshta kjo e rrezikon US Open-in, gjë që mund të rezultojë e vërtetë. Por, masat dhe protokollet që janë vendosur nga Shoqata e Tenisit e ShBA-së janë të ndryshme nga Serbia dhe Kroacia”, ka thënë Murray.

“Pikë së pari, s’do të lejohen tifozët. Koronavirusit nuk i intereson se kush jemi ne. Ajo që ne duhet ta bëjmë është ta respektojmë atë dhe t’i respektojmë rregullat”.

“Nuk mendoj se ky është një imazh i mrekullueshëm për tenisin. E vetmja gjë pozitive është që deri në momentin kur të jetë e sigurt, ne s’do të kemi tifozë të pranishëm në evente në mënyrë që ta ulim rrezikun sa më shumë”.