Haki Abazi me gjuhë urrejtëse sulmon të tjerët dhe shpall veten intelektual e feminist

Në një përpjekje meskine për ta lidhur tubimin e Vetëvendosjes për çlirimin dhe ditëlindjen e saj, zv.kryeministri Haki Abazi ka lidhur një gjë të tillë me protestat anti-raciste në vendet më të zhvilluara të botës. 

Në fakt, ishte analisti i partisë së tij politike, Tomë Gashi, ai i cili në një akt të paprecendent pasi Vetëvendosje e kishte marrë pushtetin e kishte shkelmuar lëmoshën e një lypësi të komuniteteve pakicë në qendër të Prishtinës. Ky sulm racist nuk ishte dënuar, dhe avokati Gashi asnjëherë nuk ishte ftuar.

Sidoqoftë, ai nuk ka ngurruar që ta lidh Vetëvendosjen me lëvizjen që dënon brutalitetin policor ndaj komunitetit zezak në ShBA, përcjell Periskopi.

Z.Abazi duke e bërë një gjë të tillë ka përdorur edhe një fjalë mjaft interesante “analfabet antifeminist.” Në fakt, ishte vetë Abazi ai që ishte dëgjuar duke shkëmbyer fyerje seksiste në një emision televiziv me Dardan Molliqajn. Po ashtu, duhet thënë se përveç emrave të përveçëm, emrat e tjerë mbarojnë me shkronjën “ë” në shumës. Sidoqoftë, përkundër gabimeve të panumërta drejtshkrimore, Abazi vendos t’i njohë vetes feminizmin dhe intelektualitetin në të njëjtën kohë.

Edhe në këtë status Abazi ka përdorur gjuhë të shfrenuar urrejtëse dhe nxitëse. /Periskopi 

Statusi i plotë:

Prishtinë, New York, Berlin, Londër… në të njejtën javë- për drejtësi e barazi kundër racizmit dhe kundër padrejtësisë!

Padrejtësinë e luftojmë vetëm bashkë dhe një qëllim na bën të gjithë globin bashkë: për jetë të mirë, për barazi e vërtetësi.

Janë qytetarët pronarët e shtetit, janë votuesit që bëjnë demokracinë, jo marrëveshjet me të denuar, jo me president lakuriq nate, jo marrëveshjet me analfabet antifeminist, jo me marrëzirat e gryksëve, prodhuesve të lajmeve të rrejshme, propagandës së yellow press që janë në tezga mediale dhe që prodhojnë zhurmë për të manipuluar masat me gënjeshtra. Por masa e ka të ditur, demokracia, drejtësia, barazia nuk mund të mbahen në grusht nga nje grusht pa legjitimitet, pa votë.

Zgjedhjet nuk kanë alternativë!