Aeroporti në pritje të Qeverisë për nisjen e fluturimeve

Në mbledhjen e Qeverisë së Kosovës që u mbajt më 7 qershor, ku u vendos që të hapen kufijtë tokësorë të Kosovës, të cilët ishin mbyllur si masë parandaluese e përhapjes së COVID-19. Ministri i Infrastrukturës dhe Ambientit, Arban Abrashi, tha të martën se pret që fluturimet të nisin brenda dhjetë ditësh. Nga Aeroporti Ndërkombëtar i Prishtinës “Adem Jashari”, kanë thënë për Express se janë të gatshëm për të nisur punën

Në Kosovë ka nisur faza e lehtësimit të masave ndaj pandemisë COVID-19.

Deri më tani janë hapur çerdhet, kafiteritë, restorantet, qendrat tregtare, aktivitetet sportive, muzetë, galeritë e artit, transporti urban e ndërurban, e po ashtu është larguar masa e kufizimit të lëvizjes.

Tani, qytetarët kanë të drejtë qarkullimi 24 orë në ditë brenda dhe jashtë territorit të Kosovës.

Por, transporti ajror nuk është hapur.

Zëdhënësja e Aeroportit të Prishtinës “Adem Jashari”, Valentina Gara, tha për Express se janë të gatshëm për të nisur punën.

“Ne jemi të gatshëm me të gjitha kapacitetet humane dhe teknike dhe bazuar në Agjencionin Europian të Sigurisë së Aviacionit si dhe rregullativat e autoriteteve tjera relevante që të ofrojnë shërbime kompanive ajrore dhe udhëtarëve si në nisje po ashtu edhe në ardhje”, ka thënë Gara.

Por, Gara ka bërë të ditur se për të nisur punën transporti ajror, i duhet dritë e gjelbër nga Qeveria e Kosovës.

“Mirëpo për udhëtarët në ardhje presim që në ditët në vazhdim të kemi një vendim të kemi një vendim nga Qeveria e Kosovës për lejimin e tyre dhe t’i kthehemi operimeve të plota”, deklaroi Gara.

Transporti ajror komercial ka qenë i lejuar edhe gjatë kohës së pandemisë, derisa sa iu përket fluturimeve për kthim në Kosovë, kërkesa duhet të bëhet në Ambasadën e Kosovës në vendet përkatëse.

Ndërkohë, ministri i Infrastrukturës dhe Ambientit, Arban Abrashi, të dielën në mbledhjen e Qeverisë tha se do të nis konsultimet me autoritetet përkatëse për hapjen e aeroportit.

E të martën ai tha se pret që fluturimet në Aeroportin Ndërkombëtar të Prishtinës “Adem Jashari” të rinisin brenda dhjetë ditësh.

Abrashi tha për Radion Evropa e Lirë se ka zhvilluar takime me të gjitha institucionet, përfshirë këtu Autoritetin e Aviacionit Civil, Aeroportin Ndërkombëtar të Prishtinës “Adem Jashari”, kompanitë ajrore dhe Ministrinë e Shëndetësisë, për rikthimin sa më të shpejtë të fluturimeve.

“Po bëjmë përpjekje që brenda dhjetë ditësh të bëhet rifillimi i plotë i fluturimeve ndërkombëtare, duke respektuar plotësisht udhëzimet për masat e sigurisë për parandalimin e COVID-19 [sëmundjes që e shkakton koronavirusi], të lëshuara nga Agjencioni Evropian i Sigurisë së Aviacionit (EASA) dhe udhëzimet tjera nga Ministria e Shëndetësisë”, tha Abrashi.