Zëdhënësi i Qeverisë thotë se Kurtin nuk e këshillojnë 23 por 18 këshilltarë

Zëdhënësi i Qeverisë Kurti, Përparim Kryeziu, ka shkruar në profilin e tij në Facebook në lidhje me një raportim ku jepeshin emrat e këshilltarëve të kryeministrit në detyrë, Albin Kurtit. 

Z.Kryeziu ka deklaruar që raportimi i bërë nga Express është “i pasaktë” e madje ka interpretuar edhe motivin e kësaj gazeta duke shtuar se “ishte qëllimisht i pasaktë”.

Në fakt, në raportimin në fjalë të përcjellur edhe nga Periskopi, fokusi i lajmit ishte te emrat e anëtarëve të stafit të kryeministrit në detyrë Kurti.

Në mesin e këtyre emrave ishte edhe ai i Kryeziut, që kryen funksionin e zëdhënësit, por edhe emrat e asistentëve, fotografëve e të tjerëve.

Kryeziu ka deklaruar se Kurti i ka të emëruar 18 këshilltarë politikë, prej të cilëve sipas tij “4 janë të jashtëm dhe shërbejnë pa pagesë”.

Kujtojmë që pjesë e njerëzve që këshillonin Kurtin ishte edhe Shkëzen Gashi, i cili ishte shkarkuar muajin e kaluar.

Statusi i plotë: 

Kur raportimi është qëllimisht i pasaktë

Në lidhje me lajmin e shpërndarë sot nga Gazeta Express për numrin e këshilltarëve të Kryeministrit Kurti.

Lajmi se Kryeministri Kurti ka 23 këshilltarë është qëllimisht i pasaktë. Kryeministri Kurti ka të emëruar 18 këshilltarë politik, prej të cilëve 4 janë të jashtëm dhe shërbejnë pa pagesë. Kjo mund të konfirmohet nga i njëti burim nga edhe është shërbyer mediumi në fjalë, në faqen zyrtare të Kryeministrit.

Përveç këshilltarëve, kabineti i Kryeministrit po ashtu përbëhet nga asistenti personal, zyrtarja e lartë ekzekutive, zyrtarja e lartë administrative, fotografi dhe asistenti i protokollit të Kryeministrit.