Pustec, pandemia bllokon edhe çajin e malit

Bashkia e Pustecit në Shqipëri është një zonë ku mbillet masivisht çaj mali.

Mbi 70% e banorëve të kësaj zone, e kanë çajin burimin e vetëm të të ardhurave për familjet e tyre, pasi kulturat e tjera bujqësore nuk zhvillohen shumë në këtë tokë.

Por këtë vit, çmimi i çajit jo vetëm që ka rënë shumë, por me sa duket pandemia ka bërë që edhe pse me çmim nën kosto, të mos ketë kërkesa, duke krijuar qindra kuintalë stok, shkruan a2news.

Situata njihet edhe nga bashkia e Pustecit, ndërsa kryetari i saj pohon se janë në bisedime me firma të huaja për të mbledhur çajin në zonë. E derisa të gjendet një zgjidhje, banorët e Pustecit i apelojnë qeverisë atje që t’i ndihmojë në shitjen e çajit që u ka mbetur stok.