Rugova: E kemi nën kontrollë situatën me koronavirus, të hiqen nga izolimi dy famijet në Istog

Deri sot nga informacionet zyrtare të publikuara nga Instituti Kombëtar i Shëndetësisë Publike të Kosovës janë 8 raste të konfirmuara pozitiv me Covid-19 në komunën e Istogut. Një person ka vdekur ndërsa një tjetër është shëruar.

Kryetari i Komunës së Istogut, Haki Rugova në një prononcim për Periskopin ka dhënë detaje për të infektuarit dhe familjet që janë në izolim.

‘’Për momentin gjendja është mirë në Istog. Do të thotë janë tetë të infektuar, një grua ka vdekë. Një 80 –vjeçar ka qenë në spital dhe është kthy sepse ka dalë negative. Në fillim kur ka shkuar ka konstatu pozitiv, tash është i lirë’’, tha Rugova.

Katër persona që kishin rezultuar pozitivë në testimet për COVID-19, të gjithë e kanë marrë virusin në Pejë, pasi kishin qenë në një varrim atje.

Për këto raste, Rugova tha se janë në përkujdesje dhe se do të bëhen sërish teste.

‘’Në zonat ku ka të infektuar janë në përkujdesje, të gjithë familjarët që kanë qenë të infektuar nga rasti i Pejës, janë në përkujdesje të vazhdueshme dhe me sa e di sot do të bëhen edhe disa teste’’, tha Rugova për Periskopin.

Rugova bën thirrje që dy familjet e izoluara të lirohen nga izolimi meqenëse komuna e ka nën kontrollë situatën.

‘’Istogu nuk është në karantinë. Kisha dashtë që rasti i familjes Kukleci dhe familja në Studenicë, të lirohen, të jenë të lirë dhe mendoj që do të ia dalim shumë shpejtë ta rrumbullakësojmë problemin e përhapjes së pandemisë’’, përfundon Haki Rugova./Periskopi/