Polici rreh me grushta gazetarin në Fier, dyshonte se i ngacmonte të dashurën (PAMJE)

Një sherr mes një polici të rrugores që ishte jashtë shërbimit dhe një gazetari ka ndodhur sot në Fier. Siç shihet dhe nga pamjet e siguruara nga Dosja.al, polici bashkë me një person tjetër që udhëtonin me një makinë tip “ Benz”, kanë dalë nga mjeti i tyre dhe kanë nisur të qëllojnë me mjete të forta xhamin e makinës “Opel” , ku udhëtonte gazetari.

Polici bashkë me personin tjetër që e shoqëronte kanë shkuar tek dera makinës së gazetari, që drejton një media lokale në Fier, i kanë thyer xhamin dhe e kanë qëlluar me grushte.

Vajza, e cila mësohet se është shkak për sherrin, pasi Polici ka akuzuar gazetarin se e ngacmonte, po mundohet të frenojë këtë sherr, por ata vijojnë të qëllojnë shoferin në “Opel”.

Në vendngjarje ka mbërritur menjëherë patrulla e policisë, e cila ndodhej aty pranë dhe ka shoqëruar në Komisariat të Policin dhe gazetarin. Pas ngjarjes Drejtori i Përgjithshëm i Policisë, Ardi Veliu ka pezulluar nga detyra efektivin që u përfshi në sherr.