Latifi kundër Haxhiut: Nuk duhet t’i falim krimet e luftës

Filozofi Blerim Latifi ka bërë një postim në profilin e tij në Facebook e në të cilin ka problematizuar çështjen e faljes/mosfaljes së krimeve të luftës. 

Ideja e faljes/mosfaljes së krimeve të luftës ishte dhënë nga gazetari Baton Haxhiu i cili kishte deklaruar se “pas 20 vitesh drejtësia s’i hynte kujt në punë.”

Megjithatë, përmes një leksioni hebraik, filozofi Blerim Latifi kundërshton një gjë të tillë duke thënë se askush nuk ka të drejtë të flas në emër të popullit, e sidomos në emër të viktimave, përcjell Periskopi.

“Nëse ne i falim kriminelët, pa i pyetur viktimat, ne bëjmë një akt të dytë krimi kundër tyre, sepse po i përdorim ato për një qëllim që nuk ka të bëjë me to, por me interesat tona.” – shkruan Latifi.

Në fakt, Haxhiu nuk ka kërkuar që krimet e luftës të faleshin moralisht por që të faleshin përmes një marrëveshjeje që do t’i shfuqizonte dënimet e mundshme gjyqësore. Edhe kjo ide si e tillë është refuzuar kategorikisht nga shumë njerëz në Kosovë.

Statusi i plotë: 

Leksioni hebraik për problemin e amnistimit të krimeve të luftës

Pjesë e shkëputur nga një shkrim i imi, i publikuar muaj më parë.

Simon Vizentali, si i burgosur në kampet naziste të shfarosjes, të vendosura në Poloni, një ditë, bashkë me disa të burgosur të tjerë, dërgohet në një spital nazist për t’i kryer disa punë. Aty, në një kthinë, takohet me një ushtar nazist, i cili është duke vdekur nga plagët e rënda që i ka marrë gjatë luftimeve në frontin rus. Ushtari, që është duke dhënë shpirt, kërkon t’i rrëfehet Vizentalit, njësoj siç i rrëfehen priftit të krishterët e penduar në prag të vdekjes.