E çuditshme ajo që po ndodh me Berishën, nuk e di ku do luajë sezonin e ardhshëm

Etrit Berisha në këtë sezon është një nga portierët më të spikatur në Serinë A. Edhe pse ai është pjesë e SPAL të zhytur në zonën e ftohtë të klasifikimit, gardiani i kuqezinjve ka treguar formën e tij me pritje të njëpasnjëshme duke u bërë protagonist në shumë ndeshje e rezulton mes gardianëve më efikas sa u përket pritjeve në gjuajtjet ndaj kuadratit të tij në Serinë A.

E megjithatë, për Berishën nuk është e qartë se ku do të vazhdojë karrierën e tij në edicionin e ardhshëm. Portieri është në huazim me të drejtë blerje nga Atalanta te SPAL. Megjithatë, në mediat italiane është bërë e ditur se e drejta e blerjes së kartonit për SPAL hyn në fuqi vetëm nëse arrin të mbijetojë në Serinë A, përndryshe Berisha kthehet te Atalanta.

Berisha ka lënë të kuptohet se është gati të qëndrojë te SPAL në rast mbijetese, por situata e klubit nuk është ndër më të mirat dhe me krizën e koronavirusit, skuadra vështirë se mund të përballojë edhe koston e tij.

Berisha është aktualisht lojtari më i paguar në skuadër me 1 milion euro në sezon, shifër që vështirë se mund të përfitojë në edicionin tjetër edhe nëse gjithçka shkon mirë me SPAL dhe kjo e fundit mbijeton. Ndaj në Itali e shohin të ardhmen e tij të pasigurt dhe një kthim te Atalanta mëse të mundshëm, edhe pse atje nuk ka hapësira aktivizimi. /vipsport.al/