Dumoshi: Rikard Ljarja la gjurmë të pashlyeshme në tërë kulturën shqiptare

Ministrja në detyrë e Kulturës, Rinisë dhe Sportit Vlora Dumoshi, i ka dërguar një telegram ngushëllime familjes me rastin e vdekjes së aktorit Rikard Ljarja.

Dumoshi tha se kishte marrë me pikëllim të thellë të aktorit, regjisorit dhe skenaristit tonë të madh.

E para e MKRS-së shtoi se ai la gjurmë të pashlyeshme në tërë kulturën shqiptare.

Telegrami i plotë i ngushëllimit:

E nderuara familja Ljarja,

 Me pikëllim të thellë e mora lajmin për vdekjen e të dashurit tuaj Rikardit, aktorit, regjisorit dhe skenaristit tonë të madh, që la gjurmë të pashlyeshme në tërë kulturën shqiptare.

 Puna, kontributi dhe angazhimi i tij, në fushën e teatrit dhe sidomos të kinematografisë, e ka bërë atë figurë të rëndësishme në historinë e kulturës shqiptare.

 Ai me shumë punë dhe dashuri për artin, e ngriti kulturën shqiptare në një nivel tjetër.

 Ne në Kosovë, jemi ushqyer me kulturën shqiptare nëpërmjet veprave të cilat na ka sjellë Rikardi bashkë me shumë aktorë e artistë tjerë shqiptarë.

 Jemi rritur me filmat ku protagonist ka qenë ai. Nga shumë filmat që Rikardi mori pjesë, nuk mund të harrohen dot “Rrugët e bardha”, “Pesha e kohës”, e shumë filma të tjerë si dhe angazhimi i tij në teatrin “Migjeni” i cili ishte një thesar në mesin e xhevahireve të tjerë që kishte Shkodra.

 Vdekja e tij është humbje e madhe për artin shqiptar, por korpusi i veprave filmike që ai la pas vete, janë një pasuri e çmuar artistike që ka vulën e kulturës shqiptare dhe bën që emri i tij të mos harrohet kurrë. Fizikisht, ai nuk do të jetë më i pranishëm me ne, por do të kujtohet gjithmonë përmes veprës shumë të çmuar dhe me vlerë që la pas.

 E nderuara familje Ljarja, të dashur miq të tij, i tërë komuniteti artistik mbarëshqiptar, pranoni ngushëllimet e mia më të përzemërta.

 I përhershëm qoftë kujtimi për të dhe i lehtë i qoftë dheu.