Bekim Jashari uron besimtarët myslimanë për Ramazanin

Kryetari i Komunës së Skenderajt, Bekim Jashari, ka përgëzuar besimtarët myslimanë me rastin e fillimit të muajit të shenjtë të Ramazanit, duke uruar agjërim të lehtë.

Ai në një postim në Facebook porosit besimtarët myslimanë që për shkak të pandemisë kësaj radhe të evitojnë iftaret e përbashkëta, si formë e parandalimit të përhapjes së COVID-19.

“Ju lutem që pavarësisht besimit, dëshirës dhe vullnetit që keni për të vizituar e për të bërë iftare të përbashkëta, kësaj radhe të mos e bëni këtë, sepse kështu mund të rrezikojmë shëndetin e të gjithëve”, ka shkruar Jashari.

Postimi i plotë:

Të dashur qytetarë të besimit Islam, në emër të komunës së Skenderajt dhe në emrin tim personal, ua uroj muajin e shenjtë të Ramazanit, Agjërim të lehtë e të pranuar!

Uroj që ky muaj të na bëjë edhe më humanist e solidarë që t’i ndihmojmë njëri-tjetrit, të bashkohemi duke ia shtrirë dorën njëri tjetrit për të mirën e përbashkët, të shtetit dhe shoqërisë sonë.

Vetëm kështu të bashkuar duke besuar në vlerat më të lartë njerëzore e fetare mund të tejkalojmë sfidat që kemi para nesh.

Muaji i shenjtë i Ramazanit këtë vit po në gjenë me një epidemi që ka kapluar tërë globin.
Si shtet i ri, falë disiplinës së treguar nga qytetarët dhe punës së përbashkët e të palodhshme të mjekëve, policëve, e të gjithë të tjerëve po arrijmë që të kontrollojmë deri një një masë këtë infeksion.

Uroj që ky infeksion të kalojë sa më shpejtë që ne si çdo herë tjetër të bashkuar të festojmë festën e Fitër Bajramit.

Të dashur qytetarë,

Ju lutem që pavarësisht besimit, dëshirës dhe vullnetit që keni për të vizituar e për të bërë iftare të përbashkëta, kësaj radhe të mos e bëni këtë , sepse kështu mund të rrezikojmë shëndetin e të gjithëve.

Besim, humanitet, solidaritet e vëllazëri në këtë muaj të shenjtë të Ramazanit!

Bashkë do t’ia dalim!