Vlera e lojtarëve të Kosovës arrin në 102 milionë: Rivalët e Grupit në Ligë të Kombeve mbesin poshtë

Kombëtarja e Kosovës në futboll, kategoria e meshkujve, është shortuar në Ligën e Kombeve në kuadër të Grupit C bashkë me Slloveninë, Greqinë dhe Moldavinë. Një grup që nga disa po cilësohet i fortë, e nga disa i dobët.

Për ta qartësuar më shumë një gjë të tillë, Periskopi ka krahasuar të dhënat nga revista prestigjioze Transfermarkt mes të trija kombëtareve, për të parë vlerën e tyre.

Nga lojtarët e Kosovës që ishin pjesë e grumbullimit të mëhershëm në kuadër të kualifikimeve për EURO2020, del se vlera totale e lojtarëve shkon për herë të parë mbi 100 milionë. Saktësisht, Kosova vlen plot 102 milionë e 400 mijë.

Lojtari më i vlefshëm vazhdon të jetë Milot Rashica me 35 milionë, i pasuar nga Rrahmani e Muriqi që vlejnë nga 12 milionë secili. Hadërgjonaj vlen 7 milionë, Zeneli 5 milionë aq sa edhe Valon Berisha, ndërkohë që lojtarët e tjerë janë poshtë kësaj shume.

Por, sa është vlera në treg e lojtarëve të kombëtareve tona rivale?

E kush mund ta kishte besuar para disa vitesh që Kosova do të vlente më shumë në treg se Greqia, por ja që realiteti është i tillë. Kosova vlen më shumë se 20 milionë më shumë se kombëtarja helene. Sidoqoftë, vlen për t’u përmendur që te kombëtarja helene në grumbullimin e fundit nuk ka qenë fare lojtari më i vlefshëm Kostas Manolas që peshon plot 40 milionë.

Sllovenia vlen më shumë se Kosova, për fat të keq, me 162 milionë euro në total. Por, këtë shumë të madhe për sllovenët e garanton portieri 27 vjeçar Jan Oblak që peshon hiç më pak se 100 milionë i vetëm. Po ta heqim portierin, Kosova del se ka vlerë shumë më të lartë edhe se kombëtarja tjetër ballkanase.

Ndërkohë, Moldavia nuk mund të krahasohet në asnjë aspekt me Kosovën. Ajo vlen vetëm 19 milionë e 350 mijë, ose pak më shumë se njëra këmbë e Milot Rashicës. Lojtari më i shtrenjtë i kësaj kombëtareje është Artur Ionita i Cagliarit që peshon 4,5 milionë. /Periskopi