Putini do të flas shqip: Sputniku famëkeq afër hapjes së portalit me propagandë ruse që targeton shqiptarët

Sputnik News thirret agjencia ruse e lajmeve që përhap lajme të shumta dezinformuese dhe që besohet se kontrollohet nga Kremlini zyrtar, ndërsa sipas disa burimeve, kjo agjenci do të hapë një degë portali edhe në gjuhën tonë amtare, në shqip.

Dega e Sputnik në Serbi (Sputnik Serbia), sipas këtyre burimeve, ka marrë rolin menaxhues në realizimin e këtij projekti.

Sputnik u krijua me 10 nëntor 2014, nga Rossiya Segodnya, një agjenci e lajmeve në pronësi të qeverisë ruse, e cila u krijua nga një Urdhër Ekzekutiv i Presidentit të Rusisë më 9 dhjetor 2013, dhe që nga atëherë është akuzuar nga NATO zyrtare dhe politikan perëndimorë, si një ndër armët më të fuqishme propaganduese të Rusisë.

Kjo agjenci lajmesh shpërndan lajme në më shumë se 30 gjuhë të ndryshme të botës, e tash së shpejti, po pritet të transmetoj lajme edhe në gjuhën shqipe.

Me qëllim të aplikimit të mëtutjeshëm të luftës hibride, kundër vendeve perëndimore, dhe anëtarëve të NATO-s, Rusia, ka investuar dhe investon miliona euro, në propagandë të zezë, për arritjen e qëllimeve të saj.

Duke qenë gjithmonë destruktive, Rusisë nuk i konvenon një stabilitet i qëndrueshëm në rajon, prandaj vazhdon aplikimin e masave propaganduese me qëllim të tensionimit të situatës dhe prishjes së stabilitetit.