Plani i Konjufcës për luftën ndaj Daçiqin në diplomaci pas humbjes së fundit: Largimi i asaj që fitoi çdoherë për Kosovën

Vetëvendosje kishte qenë shumë e ashpër ndaj ish shefit të diplomacisë tonë, z.Behgjet Pacolli sa herë që ndonjë shtet i botës e tërhiqte njohjen e pavarësisë tonë.

Por, tashmë shefi i diplomacisë tonë nga Vetëvendosje, Glauk Konjufca, nuk ka pasur asnjë fjalë për të arsyetuar tërheqjen e njohjes nga shteti afrikan i Sierra Leones.

Tërheqja e njohjes nga Sierra Leone bën që numri i njohjeve për Kosovën të jetë vetëm 92, ose më i vogël se sa numri i shteteve anëtare të OKB-së që nuk e kanë njohur Kosovën.

Dhe, në vend që të hartonte një strategji me të cilën do të luftohej kjo fushatë agresive e Serbisë, në këtë moment vendimtar për vendin, z.Konjufca ka propozuar tërheqjen e shtatë ambasadorëve nga misionet e tyre diplomatike, shkruan Periskopi.

Në mesin e këtyre ambasadorëve është edhe zonja Vlora Çitaku, e cila është shquar për paraqitje dinjitoze dhe përplasje të ashpra për Kosovën me Ivica Daçiqin në Këshillin e Sigurimit të OKB-së.

Pra, strategjia e z.Konjufca për të luftuar Daçiqin, kryediplomatin e Serbisë, del se është shkarkimi i asetit më të vlefshëm dhe më efikas në këtë luftë: Vlora Çitakut.

Çitaku madje para disa muajsh kishte mbrojtur edhe kryeministrin Albin Kurti, i cili ishte sulmuar nga Daçiq në OKB.

Ky është një moment shumë i rëndësishëm për Kosovën, duke qenë se argumenti i shumicës së shteteve anëtare të OKB-së tashmë në tryezën e diskutimeve përvetësohet nga Kosova. Kosova më herët e përdorte këtë argument, pasi ishte njohur nga 115 shtete. /Periskopi