Koronavirusi, qytetarët nisin sigurojnë ushqime në rast të përhapjes së madhe në Kosovë

E as qytetarët e Kosovës nuk kanë qëndruar imun nga frika dhe paniku i koronavirusit. Nëpër marketet e kryeqytetit janë dyfishuar e trefishuar shitjet në dy ditët e fundit, shkruan lajmi.net.

Lajmi.net ka vizituar disa nga marketet e mëdha të kryeqytetit për të biseduar për rritjen e shitjeve, furnizimit me mall dhe për kërkesat e konsumatorëve.

Në njërën nga marketet e Prishtinës për lajmi.net kanë treguar se ka pasur rritje të jashtëzakonshme të konsumatorëve dy ditët e fundit.

“Dy ditët e fundit po, ka pasur rritje siç edhe po e shihni, qytetarët më shumë se zakonisht marrin ushqime me shumicë, kryesisht gjëra ushqimore dhe produkte higjenike”, thotë B.E, menaxhere e shitjes.

Në një market tjetër të Prishtinës, për lajmi.net kanë treguar se kanë mungesë të produkteve të higjenës por gjithashtu kanë thënë se shitjet janë rritur dje e sidomos sot.

“Po dje dhe sot, por sidomos sot që nga mëngjesi ka shumë shitje. Na është dashur të thërrasim punëtorë shtesë sot për të arritur t’i përgjigjemi konsumatorëve. Kryesisht po shiten artikujt ushqimor elementar si miell, makarona, vaj, produkte të bylmetit dhe të ngjashme”, thotë menaxheri i shitjes në këtë market.

Sipas këtyre marketeve, çmimet e produkteve ushqimore dhe të tjerat ende nuk janë rritur, por kjo mund të ndodh për shkak se blerja e madhe mund të shkaktojë mungesën e tyre.

“Po rritje të shitjes ka pasur sot, dje nuk ka qenë më ndryshe, sot po, nuk e di pse ka ndodhur. Rritje të çmimeve nuk ka ende çuditërisht, por mund të ketë nëse vazhdon kjo gjendje paniku dhe këto blerje të mëdha, mund të rriten edhe çmimet”, tha një shitës tjetër.

Pavarësisht kësaj, disa markete të Prishtinës kanë filluar të zbrazen nga artikujt ushqimorë.

Në disa fotografi që lajmi.net ka siguruar nga lexuesit shihet se nëpër markete të ndryshme kanë përfunduar artikujt ushqimorë të ndryshëm.

Sipas këtyre lexuesve, produktet më të shitura janë makaronat, pashtetat, mielli, vaji dhe të ngjashme.