Këshilltari i Presidentit: Albin Kurti që dy dekada akuzon qeveritë për veriun, sot po hesht kur atje zbatohen masat e Serbisë

Adil Behramaj, këshilltari i Presidentit Hashim Thaçi, nëpërmjet një postimi në facebook ka kritikuar qasjen e Kryeministrit Albin Kurti në detyrë për komunat e veriut, duke thënë se ato janë jashtë kontrollit menaxhues të Qeverisë së Kosovës në luftimin e pandemisë së koronavirusit.

Behramaj ka thënë se kryeministri në detyrë Albin Kurti, ndër vite kishte kritikuar qeveritë e kaluara për mos shtrirje të autoritetit të plotë në veri, ndërsa tani as që po i përmend komunat veriore dhe situatën pandemike atje e cila po menaxhohet nga Serbia, përcjell Periskopi.

Postimi i plotë i Adil Behramajt:

Komunat e veriut të Kosovës janë tërësisht jashtë kontrollit menaxhues të Qeverisë në dorëheqje për pandeminë COVID-19.

Kryeministri në ikje e ka gojën plotë fjalë miradije për luftimin e pandemisë, por në komunat e veriut të Republikës së Kosovës nuk po zbatohen masat e Qeverisë sonë, por ato të Qeverisë së Serbisë. Ndërprerja e mësimit dhe ora policore në veriun e vendit kanë nisur me vendime të Qeverisë së Serbisë dhe jo me vendime të Qeverisë së Kosovës. Direktivat që po zbatohen në veri nga autoritetet dhe qytetarët e komunitetit serb, qoftë për distancë fizike, qoftë për kujdes shëndetësor, janë direktiva të Qeverisë së Serbisë.

Menaxhimi i situatës me pandeminë duhet të shtrihet në tërë territorin e Republikës së Kosovës. Qeveria e ka për detyrë të sigurohet që masat e ndërmarra nga institucionet përgjegjëse të Republikës së Kosovës të zbatohen në çdo cep të vendit.

Albin Kurti plot dy dekada sa ishte opozitë i ka akuzuar qeveritë e kaluara për shtrirje jo të plotë të autoritetit në komunat e veriut të vendit, ndërsa tash as që po flet për këtë situatë të ndjeshme, që kërkon direkt reagimin e tij.

Dallimin ndërmjet qytetarëve të të gjitha komuniteteve në Kosovë, Qeveria e tij e ka bërë edhe në organizimin e platformës online për mësimin parauniversitar, duke përjashtuar tërësisht nxënësit serbë nga planprogramet arsimore të platformës digjitale.