Haki Abazi: Qeveria mori vendim për ta rritur disiplinën, vetëm Thaçi e Mustafa po e kundërshtojnë këtë

Zëvendëskryeministri i Kosovës, Haki Abazi ka bërë thirrje edhe njëherë që të respektohet vendimi i mbrëmshëm i qeverisë për kufizimin e lëvizjes, ani pse i njëjti shkaktoi shumë reagime duke u konsideruar edhe në kundërshtim me Kushtetutën.

Abazi me anë të një postimi në Facebook ka thënë se vendimi i mbrëmshëm ishte për forcimin e disiplinës dhe për të mos rrezikuar qytetarët

Zëvendëskryeministri ka akuzuar kreun e LDK-së, Isa Mustafa se i ka bashkërenduar veprimet me presidentin Thaçi për kundërshtimin e këtyre masave.

Postimi i plotë:

Mirëmëngjesi!

Të jemi të qartë, mbrëmë Qeveria e Republikës së Kosovës mori vendime për të rritur disiplinën, për të mos rrezikuar qytetarët dhe për të zvogëluar në minimum mundësinë e infektimit dhe shpërndarjes së virusit Covid-19.

Ky është preokupimi kryesor i Qeverisë Kurti. Gjithaq, Kancelarja Gjermane ka përshendetur dhe ka përkrahur vendimet e Qeverisë dhe ka biseduar direkt me kryeministrin Kurti.

Vetëm dy persona dolën kundër në të njëjtën kohë: Thaçi dhe Mustafa.

Nuk e patën hallin te tarifa, por sesi të ndikojnë për ta ndalur e penguar punën e Qeverisë Kurti.

Presidenti Thaçi kreu vepër penale mbrëmë dhe kjo nuk është hera e parë. Ai thirri policinë që të mos e respektojë vendimet e qeverisë. Bazuar në cilin ligj apo kushtetutë ka të drejtë, çfarë në fakt do!?