A do të vazhdohet Superliga e Kosovës pa tifozë? Flasin nga FFK-ja

Përveç shëndetit, ky virus ka prekur edhe aktivitetet sportive. Shumë ndeshje të anuluara, shumë të tilla pa tifozë – kanë bërë që paniku të jetë edhe më i madh.

Edhe në Kosovë, nuk përjashtohet mundësia e përhapjes së koronavirusit – edhepse deri tani fatmirësisht nuk ka asnjë të konfirmuar, shkruan lajmi.net.

Lajmi.net ka kontaktuar me Federatën e Futbollit të Kosovës, më saktësisht me sekretarin Eroll Salihu, i cili ka konfirmuar se në koordinim me Ministrinë e Sportit dhe atë të Shëndetsisë do të merren masat e nevojshme në rast të përhapjes së kësaj epidemie.

‘’Së pari na jemi kontakt me Ministrinë e Sportit dhe Shëndetsisë, kjo i kalon kompentecat e Federatës dhe ne jemi së bashku. Në vendin e tonë nuk ka asnjë rast të infektimit, por nuk do të thotë që nuk do të ketë – megjithatë të gjitha masat do të merren së bashku’’.

A ekziston mundësia që ndeshjet në vijim të luhen pa tifozë, ai u shpreh: ‘’Nëse do të ketë rekomandime nga Ministria, atëherë është punë e kryer. E patë edhe ndeshjen Juventus – Inter e lëre më tek ne’’, deklaroi Salihu për lajmi.net.

Kujtojmë se vetëm para pak çastesh në shtetin fqinjë, në Shqipëri, kryeministri Edi Rama vendosi t’i pezullonte të gjitha aktivitetet sportive deri më 3 prill – ndërkohë Federata Shqiptare e Futbollit ka ardhur me propozimin që ndeshjet të luhen pa tifozë. /Lajmi.net/