Spahiu thotë se edhe atij iu vodhën idetë, pasi Kurti vodhi idenë e Kadaresë

“Bashkësia ndërkombëtare duhet ta ndihmojë Serbinë që të çlirohet nga Kosova,” – deklaroi në Mynih z.Albin Kurti, në një video-inçizim që rrodhi për të justifikuar uljen në një tavolinë me presidentin serb, Aleksandër Vuçiq, edhe pse Serbia ende nuk ka kërkuar falje për krimet e luftës.

Kurti iu referuar mitit të Serbisë për Kosovën, duke besuar që ky mit po e pengonte rrugëtimin e saj për në Bashkimin Evropian. Në fakt, e kundërta është e vërtetë. Serbia ka përdorur mitin për Kosovën dhe aleancën me Rusinë për të përforcuar pozitën e saj në gjeopolitikën ndërkombëtare, dhe madje edhe Kurti e ka vërejtur një gjë të tillë me deklaratat e mëparshme.

Serbia thith 52 për qind të investimeve të huaja direkte në krahasim me të gjitha vendet e tjera të Ballkanit Perëndimor që marrin 48 për qind. Atëherë, për çfarë çlirimi po flet z.Kurti?

Por, ideja e tij megjithatë doli se vinte nga bota e fantazisë së shkrimtarit Ismail Kadare. Loja me fjalë në publicistë mund të jetë e lejueshme por në diplomaci mund të ndëshkohet rreptësisht.

Kurti nuk citoi as z.Kadare, por as ambasadoren e Kosovës në ShBA, Vlora Çitakun që po ashtu e kishte thënë një frazë të tillë.

Për rastin ka reaguar edhe Nexhmedin Spahiu, publicisti nga Mitrovica, i cili pretendon se 90 për qind e personaliteteve publike në Kosovë i kanë vjedhur idetë dhe “do të duhej të futeshin në burg” për një gjë të tillë, shkruan Periskopi.

Më poshtë është statusi i tij në Facebook: 

Nëse mbi idetë do të kishte të drejta pronësie, 90 % e personaliteve publike në Kosovë do të duhej të futeshin në burg për shkak të vjedhjes së ideve të mia. Nuk ka problem që i vjedhin idetë e mia pa më cituar, po ua fali ato, po problemi është se po i marrin ato me 20 a 30 vite vonesë.