Rama tallet me Metën: Ka më shumë se një shtëpi, është luks të merrem me të

Kur na ndajnë vetëm pak ditë nga 2 marsi, datë në të cilin presidenti Ilir Meta ka thirrur qytetarët që të marrin pjesë në një manifest kombëtar, kundër atij që ai e cilëson grusht shteti, vjen një koment nga kryeministri Edi Rama.

Teksa ishte i pranishëm në aktivitetin ku po prezantohet projekti për rindërtimin e banesave të dëmtuara nga tërmeti, Rama nuk i kurseu ironitë, ndërsa theksoi se presidenti ka shtëpi, ndërsa ai ishte aty për ata që jetonin në çadra. Në këtë linjë ai theksoi se ishte luks i madh për të që të merrej me presidentin.

Presidenti e ka shtëpinë. Më shumë se një shtëpi. Unë jam këtu për ata që jetojnë në çadra dhe presin që të futen në shtëpinë e tyre. Për ata jam unë këtu, jo thjesht në këtë konference, por në të gjitha orët e ditës time me gjithë natën. Jua kam lënë juve çështjen e presidentit. Unë nuk merrem me Presidentin. Është shumë luks i madh për mua të merrem me Presidentin.”, tha ai.