Prokuroria Publike: Bombola e gazit në Rramanli, e palicencuar

Bombola e gazit 20 litërshe, e cila shpërtheu në fshatin Rramanli, duke lënë 4 të vdekur dhe 6 të lënduar, nuk ka qenë e licencuar, bën të ditur Prokuroria Publike. Sipas Prokurorisë, bombola ka qenë e pavulosur dhe e patestuar. Përdorimi i bombolave të gazit janë shumë ekonomike për amvisëritë, por një përdorim i pakujdesshëm mund të shkaktojë edhe tragjedi, shkruan TVM2.

Sa qytetarët përdorim bombola gazi? Disa përdorin e disa frikësohen

Qytetarët e anketuar nga TVM2 shprehen se janë përdorues të bombolave, por iu kushtojnë një kujdes të veçantë derisa disa të tjerë nga frika nuk përdorin fare.

“Kush di të punojë me to mundet t’i marrë pse jo, kur nuk ka rrymë ato janë të mira për përdorim. Unë them që ai që nuk di të punojë me të mos të marrë fare, pasi asaj i nevojitet izolim, kushte e kështu me radhë”,- tha një qytetar.

“Jo nuk përdori se i frikësohem.”,- u shpreh një qytetar.

“E kam bombolën, e kam përdor disa muaj, por i vinte erë dhe e kam larguar.”,- theksoi një qytetar.

“Përdori bombol me gaz për kafe dhe gatim. Ia kam frikën, ja edhe rasti që ndodhi në fshatin Ramanli tregon se nuk ka siguri në ato.”,- deklaroi një qytetar.

“Përdor gaz dhe është vërtetë më lirë, e përdor për ngrohje.”,- potencoi një qytetar.

Elezi: Të blihen vetëm bombola gazi të licencuara

Por, për një përdorim pa pasoja, zjarrfikësi vullnetar, Osman Elezi, jep këshilla praktike. Ai thotë se deri te shpërthimi i bombolave të gazit në të shumtën e rasteve ka ardhur si pasojë e blerjes së tyre në vende të paautorizuara, si dhe moskontrollimi i rregullt i pajisjes, e cila duhet bërë të paktën në çdo gjashtë muaj.

“Tre këshillat kryesore që ua japim qytetarëve janë: që fillimisht të bëhet së paku një herë në gjashtë muaj servisimi i bombolave, këshilla e dytë është ajo që ku e blejmë bombolën të ketë certifikatë dhe të njëjtat të mbushen në vende adekuate dhe këshilla e tretë është që nëse hasim aromë të gazit në kuzhinë të mos përdorim pajisjet elektrike, sepse vjen më lehtë deri në eksplodim.”,- deklaroi zjarrfikësi vullnetar, Osman Elezi.

Kompania e vetme e licencuar për shitje dhe mbushje të bombolave të gazit është Kompania “Makpetrol”.