Parandalohet një sulm terrorist në Gjenevë: Të arrestuar edhe dy shqiptarë

Mediat zvicerane kanë njoftuar se autoritetet e sigurisë kanë shmangur një sulm të terroristëve islamikë afër aeroportit të Gjenevës. Mes të arrestuarve janë edhe dy shqiptarë.

Gazeta “Le Temps” e Gjenevës njofton se shërbimet sekrete amerikane kishin alarmuar kolegët e tyre zviceranë mbi rrezikun e një sulmi terrorist në Gjenevë. Sipas gazetës “Shteti Islamik” kishte planifikuar një sulm kundër depove me derivate të naftës afër aeroportit të Gjenevës. Në vjeshtë të vitit 2018 shërbimet amerikane njoftuan shërbimin sekret zviceran mbi rrezikun e sulmit. Informatat iu përcollën policisë së Gjenevës, e cila pastaj mori masat përkatëse.

Tre persona që planifikonin sulmin ishin takuar në një xhami në Gjenevë. Që të tre, sipas “Le Temps”, ballafaqoheshin me probleme të ngjashme: papunësi, vështirësi integrimi, dështime. Ata u radikalizuan në xhami.
Nga dokumente mësohet se ishte planifikuar që në Gjenevë të vinin dy shqiptarë për të realizuar planin. Ata u arrestuan rrugës për në Zvicër. Një sulm i ngjashëm, sipas të dhënave të shërbimeve amerikane, ishte planifikuar edhe në Basel.

Që nga paraqitja e “Shtetit Islamik” në skenën e përgjakshme të luftës në Siri dhjetëra shqiptarë nga diaspora kanë shkuar në Siri dhe në Irak për të luftuar për “Kalifatin e ri”. Tani që “Shteti Islamik” praktikisht është zhdukur, disa shqiptarë po mbahen në burgjet e forcave kryengritëse kurde.

Në mars të vitit 2014 një shqiptar nga Zvicra, i njohur si Qëndrim R., duke u kthyer nga Siri vrau në Turqi tre njerëz, mes tyre dy pjesëtarë të forcave të sigurisë. Që nga atëherë Qëndrim R. gjendet në burg në Turqi, ku është dënuar pesë herë me burgim të përjetshëm, domethënë me gjithsej 174 vjet burg.

Në vitin 2015 në Siri u vra Valdet Gashi, një kampion botëror i tai-boksit. Gashi jetonte në Gjermani, por kishte qëndruar shpesh në një qendër fitnesi në Winterthur afër Zürichut dhe nga aty kishte shkuar në Siri për të luftuar në anën e terroristëve islamikë.

Shërbimi sekret gjerman supozon se Gashi mund të jetë vrarë nga vetë “Shteti Islamik”. Sipas disa raporteve Gashi kishte menduar se po shkonte në parajsën siriane të cilën e propagandonte “Shteti Islamik”, por atje kishte gjetur ferrin. Në përpjekje për të ikur, ai dyshohet të jetë vrarë.
Shqiptarë të radikalizuar kanë gjetur strehë edhe te i ashtuquajturi “Këshilli Qendror Islamik i Zvicrës”, një grup militant i drejtuar nga disa zviceranë që thonë se janë konvertuar në fenë islame. Kohëve të fundit është raportuar se ky “këshill” po ballafaqohet me probleme financiare. Kanakari kryesor i “Këshillit Qendror Islamik i Zvicrës” në Kosovë është imami Shefqet Krasniqi. Ai ka qenë i ftuar edhe në konferenca të “Këshillit Qendror Islamik” në Zvicër.

Në hapësirën gjermanishtfolëse (Gjermani, Zvicër, Austri) jo pak shqiptarë janë të kyçur edhe në aksionin “Lies” (Lexo): besimtarë gjoja të pasherr shpërndajnë falas Kuranë nëpër rrugët dhe sheshet e qyteteve. “Lies” konsiderohet si porta e parë hyrëse drejt radikalizimit të të rinjve.