Matoshi pyet Kurtin: Kush nënshkroi në Mynih, zyrtarët e Lekajt apo Abdixhikut

Publicisti Halil Matoshi ka vazhduar serinë e shkrimeve të tij të cilat i publikon në formë pyetjesh për pushtetin dhe kryeministrin e ri të Kosovës, Albin Kurtin.

Matoshi këtë herë ka shkruar pas deklarimeve të Albin Kurtit se në Mynih të Gjermanisë marrëveshjen për hekurudhën dhe autostradën e kanë nënshkruar dy zyrtarë të Ministrisë së Infrastrukturës pa miratimin e qeverisë së re.

Ndërkohë Matoshi e pyet se “.. a kanë nënshkruar zyrtarët e Pal Lekajt apo të Lumir Abdixhikut”.

Për publicistin kosovar, deklarimet e Kurtit se “Marrëveshjet nuk u autorizuan nga Qeveria ime”, lënë të kuptojnë se mbase Kosova “ka dy qeveri”.

Shkrimi i plotë:

Pyetja Nr. 5 për pushtetin

A nënshkruan marrëveshje zyrtarët e Pal Lekajt apo të Lumir Abdixhikut?

Do të ishte krejtësisht normale që zyrtarët e Ministrisë së Transportit dhe Infrastrukturës të nënshkruanin marrëveshje me homologët serbë, por me nënshkruar me Marko Djurić-in, si shef i zyrës për Kosovën në Qeverinë e Serbisë, kjo së pari është legjitimim i kësaj zyre fantome dhe së dyti paraqet asimetri në përfaqësimin e shteteve: Serbia shtet dhe Kosova “ma pak shtet” – që pala serbe e cilëson si “krahinë jugore” të Serbisë!?

Albin Kurti po thotë se zyrtarë të Pal Lekajt kanë nënshkruar marrëveshje të cilën as që e ka parë !?

Në anën tjetër Kurtin e demantoi partneri i koalicionit, LDK që mbështeti marrëveshjet e nënshkruara nga zyrtarët e Lumir Abdixhikut e jo të Pal Lekës, siç i cilësoi Albin Kurti!?

Qysh është e mundshme që zyrtarë të Qeverisë së rënë pasi Kryeministri Haradinaj është dorëhequr, të nënshkruajnë marrëveshje me një shtet tjetër, prapa shpinës së shefit të Qeverisë?

Qysh është e mundshme që vartës të Kryeministrit (ata dy përfaqësues të MTI-së duhet të jenë staf civil i Qeverisë) të takohen e të bëjnë ujdi me zyrtarë të shtetit serb pa dijen e shefit të tyre?

Nëse dekonstruktohet fjalia e Kurtit “Marrëveshjet nuk u autorizuan nga Qeveria ime” del se Kosova paska dy Qeveri!?

Çka po ndodhë Kryeministër?

P.S.

Mbrojtja e interesit të Kosovës në Konferencën e Munich-it nga Kryeministri Kurti, përtej retorikave të forta, ishte prej burrështeti. Të jesh sot kundër korrigjimit të kufijve dhe ‘trikave’ serbe për “Minj Schengen ballkanik” është patriotizëm kushtetues!