Java e parë e Qeverisë Kurti: Cilat ishin veprimet e para të kryeministrit?

Nesër mbushet një javë e plotë që kur z.Albin Kurti u votua si kryeministër i Republikës së Kosovës.

Menjëherë të nesërmen e të hënës së 3 shkurtit, Kurti mori detyrën nga ish shefi i diplomacisë tonë, z.Behgjet Pacolli.

Me një ceremoni në të cilën buçiste himni i Kosovës dhe valëvitej flamuri i Kosovës, Kurti po merrte detyrën e ëndrruar për një kohë të gjatë, shkruan Periskopi.

Ai kishte me vete tashmë të gjithë emrat e ministrave e të zëvendëskryeministrave, ndërkohë që vazhdojnë të mungojnë emrat e zv.ministrave dhe të koordinatorëve nacionalë.

Shtimi i sërishëm i numrit të zv.ministrave

Deri tash, dihet vetëm emri i një zëvendësministri në Qeverinë e Albin Kurtit: Xhelal Sveçla. Sveçla u bë i famshëm pasi u pa duke pirë kafe në një konferencë në Tiranë me drejtorin e të ashtuquajturës Zyre për Kosovën dhe Metohinë, z.Marko Gjuriq.

Por, Kurti e rriti menjëherë numrin e zv.ministrave thjesht me një fjalë goje duke frikësuar qytetarët për rritje të mëtejme në të ardhmen.

Fillimisht ishin paraparë nga dy zëvendësministra për ministri, e këto ishin 12. Por, nga 24 numri automatikisht shkoi në 30 kur numri i ministrive u rrit në 15.

Sidoqoftë, në marrëveshjen me LDK-në, z.Kurti e rriti sërish numrin e zv.ministrave në 33 duke bërë që disa ministri të kishin më shumë se dy zv.ministra.

Ndërkohë, pas një takimi me shefen e Zyres së BE-së në Kosovë, numri i zv.ministrave sipas vetë Kurtit do të ishte “rreth 35”.

Me një numër të ngjashëm e kishte filluar edhe Qeveria Haradinaj, por më pas ai ishte rritur e rritur vazhdimisht.

Shqyrtimi i vendimeve të kryeministrit në detyrë Haradinaj

Albin Kurti kishte njoftuar se të gjitha emërimet dhe në përgjithësi vendimet e kryeministri Haradinaj pas dorëheqjes së tij më 19 korrik do të shqyrtoheshin.

Kjo në fakt nuk nënkupton se të gjitha vendimet do të shpallen invalide, por që vendimet që i përshtaten atij do të mbeten ndërkohë që vendimet të cilat nuk i përshtaten nuk do të mbeten në fuqi.

Ende nuk dihen rezultatet e një procesi të tillë që mund të marrë shumë kohë.

Shfuqizimi i Taksës 100%

Tarifa 100% ndaj mallrave të importuara nga Serbia përfundimisht do të hiqet.

Kurti premtoi se një gjë e tillë do të ndodhte vetëm pasi të vihej masa e reciprocitetit të plotë politik, tregtar e ekonomik me Serbinë. Kjo nënkupton që Serbia jo që duhet të paguajë 100 për qind më shtrenjtë për eksportet e saj drejt Kosovës, por që në fakt nuk do t’i fus fare ato produkte në Kosovë.

Ende nuk dihet nëse ky premtim do të mbahet ose do të dredhohet në një qëndrim tjetër përmbajtësisht të ndryshëm vetëm për ta bindur Serbinë që të kthehej në tavolinën e bisedimeve me Kosovën në Bruksel.

Një gjë e tillë e ka vënë Kosovën në një pozicion mjaft të pafavorshëm diplomatik duke e prishur strategjinë e parë në luftën kundër fushatës agresive diplomatike të saj, dhe në anën tjetër duke e vazhduar atë që vetë Kurti e quajti “kakofoni” në politikën e jashtme. /Periskopi