Heqja e taksës 100%: Kjo është vlera qesharake e përfitimeve tregtare që do të ketë Kosova

Kryeministri i Kosovës tashmë e ka ndarë mendjen për ta hequr tarifën [taksën] 100% ndaj mallrave të importuara nga Serbia.

Në fund të vitit 2018, shumë njerëz mbetën të habitur kur kryeministri i atëhershëm Ramush Haradinaj e vendosi një tarifë prej 100 për qind ndaj mallrave të importuara nga Serbia pavarësisht presioneve ndërkombëtare kundër një gjëje të tillë.

Por, ky veprim kishte ndodhur pasi që Kosova ndodhej në një defansivë të plotë diplomatike. Si rezultat i fushatës agresiva nga Politika e Jashtme serbe, Kosovës po i tërhiqeshin shumë njohje nga vende të ndryshme të botës, si dhe shteti mbeti pa anëtarësim në organizata të rëndësishme ndërkombëtare si Unesco dhe Interpol.

Haradinaj nuk e hoqi tarifën në fjalë, dhe për shkak të presionit ndërkombëtar dha dorëheqje më 19 korrik të vitit të kaluar.

Por, politika më monumentale e qeverisë së tij pritet të rrënohet nga kryeministri i ri, Albin Kurti, shkruan Periskopi.

Ai deklaroi se tarifën doganore 100% do ta zëvendësonte me reciprocitetin e plotë tregtar, ekonomik e politik edhe pse Kosova as nuk është njohur nga Serbia, e as nuk ka premtuar ndaljen e fushatës agresive politike.

Por, si qëndronin gjërat në raportin tregtar me Serbinë para vendosjes së taksës?

E vërteta është shumë e trishtë. Kosova eksportonte për në Serbi mallra në vlerë të 48 milionë e 246 mijë eurosh në vitin 2017.

Ndërkohë, në anën tjetër, Serbia eksportonte për në Kosovë mallra në vlerë prej 449 milionë e 918 mijë eurosh në po të njëjtin vit.

Krahasuar me vitin 2005, prej ku nis shtrirja e statistikave të ASK-së, eksportet e Serbisë drejt Kosovës ishin trefishuar dhe trendi vazhdonte të ishte pozitiv.

Duke parë pasojat e rënda politike të taksës nga z.Kurti, as të mirat ekonomike nuk pritet të jenë të mëdha.

Në fakt, eksporti i Kosovës drejt Serbisë nuk pritet të shënojë rritje drastike për shkak të kapaciteteve të dobta të ekonomisë prodhuese në vend./Periskopi