Ftohja e Grenellit me Kosovën: Nga Albin e Kadri, shumë shpejt në prefikse para mbiemrash

Ambasadori amerikan në Gjermani dhe i dërguari special i Shtëpisë së Bardhë për dialogun mes Kosovës dhe Serbisë, Richard Grenell, ka reaguar më herët duke kundërshtuar heqjen e pjesshme të tarifës 100% ndaj mallrave të importuara nga Serbia.

Grenell ka kërkuar që tarifa të hiqet plotësisht duke e thënë qartë se ShBA-ja nuk mbështet hapat e pjesshëm, shkruan Periskopi.

Para disa javësh, z.Grenell kishte bërë bujë pasi kishte folur në emër të Kosovës dhe madje iu kishte drejtuar dy liderëve kosovarë në emër. Ai iu drejtua kryeministrit të Kosovës, z.Albin Kurti, në emër.

Ndërkohë që njëjtë bëri edhe me kreun e partisë më të madhe opozitare, z.Veseli, duke iu drejtuar me Kadri.

Por, në postimin e fundit, Grenell i drejtohet z.Kurti si kryeministri i Kosovës z.Albin Kurti, e që tregon edhe në një mënyrë tjetër ftohjen e marrëdhënies së tij me liderët kosovarë.

“Nuk i përkrahim masat gjysmake të Kryeministrit Kurti. Qëndrimi ynë është shumë i qartë: taksat duhet të hiqen krejtësisht. Z. Kurti po bën gabim serioz – dhe kjo i është bërë e qartë Presidentit Thaçi sot në Shtëpinë e Bardhë”, ka shkruar ai në Twitter.

Ai madje shtoi gjatë postimit të fundit me ashpërsi se kryeministri ynë po bënte gabim serioz, një fjalë e rëndë kjo që mund të ketë pasoja të rënda politike . /Periskopi/