Edi Rama shpërndan postimin e Rexhep Qosjes, e quan kuptimplotë

Kryeministri i Shqipërisë Edi Rama, është pajtuar me një postim të lëshuar sot nga akademiku Rexhep Qosja, i cili ka kritikuar mediat  kosovare se po ndjellin urrejtje ndaj Shqipërisë, por edhe mbarëkombëtare.

“Kjo urrejtje ndaj Shqipërisë shtetërore nuk është urrejtje as e çastit e as e rastit. Jo. Kjo është urrejtje me motive jo vetëm politike më gjatë e menduar dhe më gjerësisht e organizuar dhe e strukturuar”, ka shkruar të martën akademik Qosja, shkruan Periskopi.

Por kryeministri Rama, thotë  se kjo urrejtje e organizuar ndaj Shqipërisë nuk është thjesht organizim i mjeteve politike, mediatike e financiare por siç thotë ai është një ofensivë e egër pushtuese e hapësirës publike të komunikimit.

Postimi i plotë i Edi Ramës

HALLALL?

Sapo më dërgoi zyra e shtypit statusin e mëposhtëm që Akademiku Rexhep Qosja ka postuar në faqen e tij sociale sot. E pata të pamundur të mos e ndaj me ju, sepse e pamundur është të mos preket plaga që një tufë xhagajdurësh, me atributet e rrejshme të patriotit a të mendimtarit, që rëndom politika a gazetaria në trojet tona u’a mveshin njerëzve pa din e as iman, po rreket të hapë, zgjerojë e thellojë, bash ashtu siç e demaskon me një qartësi të dhimbshme Rexhep Qosja, në shënimin e tij.

POR…

Në një pikë nuk jam dakord me Rexhep Qosen!

Kjo urrejtje e organizuar shoviniste ndaj Shqipërisë, siç ai e quan, nuk është thjesht një organizim mjetesh politike, mediatike e financiare, sa të paskrupullta aq edhe të errëta, e cila sipas Rexhep Qoses, mund të sjellë pasoja në marrëdhëniet mes të dy shteteve shqiptare, por një ofensivë e egër pushtuese e hapësirës publike të komunikimit, që me vulgaritetin, shpifjet dhe dritëshkurtësinë e saj, ka nisur ta dëmtojë keq vetë Kosovën.