​Vuçiq për dialogun: Me Prishtinën i kemi 48 marrëveshje e jo 33 siç thotë Kurti

Ai në një konferencë të përbashkët për shtyp me komisionarin për Zgjerim Oliver Varheji, tha se shpreson që bisedimet midis Beogradit dhe Prishtinës mund të jenë diskutime serioze të njerëzve përgjegjës.

Ai theksoi se kjo gjithmonë kërkonte dy palë, dhe se Beogradi, deri më tani, gjithmonë vepronte seriozisht dhe me përgjegjësi.

“Unë jam realist i ashpër dhe shumë pragmatik. Unë nuk pres asgjë, shpresoj se mund të kemi diskutime serioze me njerëz të përgjegjshëm, por që gjithmonë kërkohen dy palë,” tha Vuçiq, i pyetur nëse ai priste të kishte bashkëpunim më të mirë me Albin Kurti sesa me ish-kryeministrin Ramush Haradinaj.

Vuçiq theksoi se Beogradi veproi seriozisht dhe me përgjegjësi në periudhën e kaluar, dhe se ai nuk ishte i sigurt se të gjithë, madje edhe në Evropë, silleshin në këtë mënyrë, e sidomos jo pala shqiptare, e cila, kujtoi ai, nuk u përkushtua në marrëveshjen e Brukselit.

“Shpresoj që ata do të kuptojnë më mirë se sa marrëveshje kemi, sepse kam dëgjuar që kryeministri i sapoemëruar në Prishtinë ka thënë se kemi 33 marrëveshje. Unë dua ta informoj atë se kemi 48 marrëveshje, “tha Vuçiq.

Lidhur me taksën e vendosur nga ish-Qeveria Haradinaj në nëntor 2018, presidenti Vuçiq tha se ai ‘nuk pret asgjë’.

“Unë nuk pres asgjë dhe shpresoj se kjo do të lejohet për produktet serbe pas një viti dhe tre ose katër muaj pasi të ndërpritet tregtia me Serbinë,” tha Vuçiq.

Ai tha si pasojë e taksës ndaj mallrave serbe, Beogradi zyrtar ka humbur qindra miliona euro.