Pacolli për projektin e ndërtimeve tek Badoci: Luksi i tyre do të na lë pa ujë, pa tokë e pa ajër të pastër

Edhe Fitore Pacolli nga Lëvizja Vetëvendosje ka reaguar për projektin ndërtimor i cili po tentohet të realizohet pranë Liqenit të Badocit, pa leje ndërtimi nga komuna e Prishtinës.

Pacolli shkruan se pas uzurpimit të hapësirave brenda qytetit, po tentojnë tash të lënë qytetarët edhe pa ujë e ajër të pastër.

Ajo ka bërë thirrje që të bëhen të gjithë bashkë e t’i bllokojmë projektet e tilla.

Ja reagimi i plotë:

Lakmia e disave po cënon ekzistencën tonë.

Pas uzurpimit të hapësirave brenda qyteteve e parqeve tani ia kanë mësy edhe atyre pak zonave të mbrojtura që na kanë mbetur.

Luksi i tyre do të na lë pa ujë, pa tokë e pa ajër të pastër.

Ne jemi dëshmitarë të shkatërrimit të qyteteve, të parqeve, lumenjve e maleve tona. Mos të harrojmë se pothuajse të gjitha janë realizuar duke premtuar zhvillim e mbrojtje por ka ndodh krejt e kundërta. E njëjta do të përsëritet edhe me këtë projektin tek Liqeni i Badovcit që paska me qenë “tërësish ambiental” e paska me i ndihmu “ambientit e liqenit në përgjithësi”.

Të bëhemi të gjithë bashkë e t’i bllokojmë projektet e tilla. Nesër bëhet vonë sepse pas këtij do të ndërtohen edhe shumë projekte të ngashme në zonën e mbrojtur të liqenit. Të mos lejojmë që një grup njerëzish të na cënojnë ekzistencën tonë.

Bëhuni pjesë e Grupi per mbrojtjen e Liqenit te Badovcit. #perBadovcin