As Britania nuk mbështet Donald Trumpin dhe ShBA-të për kërcënimin ndaj Iranit

Qeveria britanike ka thënë se shënjestrimi i vendeve të trashëgimisë kulturore në Iran do të përbënte shkelje të konventave ndërkombëtare të luftës duke qortuar Trumpin pas kërcënimit të bërë se do të bombardonte vendet e trashëgimisë kulturore në atë vend.  

Zëdhënësi zyrtar i Boris Johnsonit refuzoi të kritikonte Trumpin në mënyrë direkte por e bëri të qartë se qeveria e Mbretërisë së Bashkuar nuk do të mbështeste veprime të tilla, pasi presidenti amerikan tha se do të shënjestronte 52 vende në Iran nëse Irani hakmerrej për vrasjen e gjeneralit Hassem Suleimani.

“Disa prej këtyre vendeve janë të nivelit shumë të lartë dhe të rëndësishme për Iranin dhe kulturën iraniane”, kishte thënë z.Trump, përkthen Periskopi nga The Guardian.

“Ka konventa ndërkombëtare në fuqi që ndalojnë shkatërrimin e trashëgimisë kulturore”, tha zëdhënësi i Downing Street duke nënkuptuar se MB nuk mbështeste këto veprime.

“Mund t’i lexoni edhe vetë konventat ndërkombëtare. Është konventa e Hagës e vitit 1954 për mbrojtjen e pronës kulturore në raste të konflikteve të armatosura;” shtoi ai.

Sidoqoftë, Downing Street ishte e kujdesshme që të mos e kritikonte në mënyrë direkte Trumpin, duke insistuar që partneriteti i sigurisë mes Britanisë dhe ShBA-ve do të vazhdonte të mbetej “tepër i afërt”. /Periskopi