Zgjedhet kryeprokurori i ri: Kush është Olsian Çela, prokurori i “dosjeve të forta”

Kuvendi i Shqipërisë e ka zgjedhur kryeprokurorin e ri me anë të një votimi të fshehtë.

Kuvendi ka votuar me 101 vota pro kandidaturën e Olsian Çelës si kryeprokuror për shtatë vjetët e ardhshme. Ai do të zëvendësojë në këtë detyrë Arta Markun.

Për Arta Markun, Kuvendi ka votuar me 11 vota pro, 22 vota kundër dhe 78 abstenime, ndërsa për Fatjona Memcaj 8 kanë qenë pro, 16 kundër dhe 87 abstenim.

Kush është Olsian Çela?

Olsian Çela e nisi karrierën në vitin 2001, pas diplomimit në shkollën e Magjistraturës. Ai konsiderohet si ‘prokurori i dosjeve të forta’.

Fillimisht ushtroi detyrën e prokurorit në institucionin e akuzës në kryeqytet. Në 2004, u emërua prokuror tek Krimet e Rënda, institucion që e drejtoi për një periudhë katër vjeçare.

Prej vitesh është anëtar bordi në shkollën e magjistraturës dhe pedagog në dy universitete. Olsian Çela është pika e kontaktit e Eurojust në prokurorinë Shqiptare.

Përgjatë viteve ka është trajnuar në disa vende të Bashkimit Europian dhe shtetet e Bashkuara të Amerikës, për çështjet e krimit të organizuar.

Është njohës i katër gjuhëve të huaja.

Prokurori Çela ka hetuar disa dosjet e bujshme, siç është Xibraka, apo grabitja në aeroportin e Rinasit në 2016, ku me firmën e tij në kërkim ndërkombëtar është Aleks Pepa.

Më herët, ai hetoi për masakrën e Kartodromit apo grupin e Niklës./ Top Channel