Shqipëri: Miratohet “anti-shpifja”, 82 deputetë votojnë pro në Kuvend

82 deputetë dhanë votën e tyre për paketën për të cilën Kryeministri shqiptar Edi Rama thotë se do të luftojë lajmet e rreme dhe shpifjet në median online, ndërsa gazetarët e konsiderojnë kapje dhe kontroll mbi median, njofton Klan Kosova.

Vetëm 13 deputetë u shprehën kundër kësaj pakete, 5 abstenuan dhe 5 deputetë nuk morën pjesë në votim.

Me paketën e re, Autoriteti i Mediave Audiovizive merr kompetenca për gjobitjen dhe siç shkruan top-channel, deri në mbylljen e portaleve nëse gjykon se kanë publikuar shpifje apo lajme të rreme.

Gazetarët argumentojnë se AMA nuk mund të marrë kompetenca që i takojnë gjykatës.

Tashmë do të jetë Presidenti i Republikës së Shqipërisë ai që do të vendosë nëse do e dekretojë ligjin apo do e rikthejë për shqyrtim në Parlament.