Meta shpreh mirënjohjen më të thellë për Gjilanin që i mikëpriti familjet nga Shqipëria

Presidenti i Shqipërisë Ilir Meta ka qëndruar sot në Gjilan ku së bashku me kryetarin Lutfi Haziri dhe kryeministrin në detyrë Ramush Haradinaj e kanë vizituar familjen Abazi për t’ju shprehur ngushëllime.

Ai më pas është pritur në takim nga kryetari i Komunës së Gjilanit.

“Kujdesi nga presidenti Meta për familjen Abazi dhe për qytetin tonë tregon përkushktimin e madh të tij. Shpreh falënderim të madh për vizitën e sotme. Askush më mirë se gjilanasit nuk e bashkëndjejnë dhembjen më vëllezërit tanë në Shqipëri sepse ne e kemi kaluar një tërmet me pasoja fatale dhe me dëme materiale në vitin 2002. Jemi bashkë në përballimin e kësaj situate”, ka deklaruar Haziri pas takimit.

Ai njoftoi se 186 shqiptarë të Durrësit janë vendosur në familjet gjilanase dhe se fëmijët e tyre prej të hënës kanë filluar të shkojnë në shkollë.

Presidenti shqiptar tha se ka ardhur në Gjilan për të shprehur falënderimin e përzemërt për solidaritetin e kësaj komune dhe të Kosovës ndaj Shqipërisë.

“Jam në Gjilan për të shprehur falënderimin më të përzemërt dhe mirënjohjen më të thellë për popullin dhe institucionet e Kosovës, FSK-në, Policinë e Kosovës dhe të gjitha ekipet tjera që erdhën të parët menjëherë pas tërmetit të tmerrshëm duke dhënë kontribut të jashtëzakoshëm për të shpëtuar shumë jetë dhe për të ndihmuar banorët e lënduar”.

Kreu i shtetit shqiptar ka falënderuar kryetarin Haziri dhe popullin e Gjilanit për mikpritjen për dhjetëra familje nga Shqipëria dhe kujdesin ndaj tyre.

“Nuk mund të mos vija sot në Gjilan për të qëndruar pranë familjes Abazi e cila pati një humbje të jashtëzakonshme në këtë tragjedi. Por, me solidaritetin e jashtëzakonshëm të Gjilanit, të kyetarit Haziri, këtë dhembje do të jetë e mundur të tejkalohet dhe fëmijët e tyre do të kenë mundësi që të shohin me besim drejtë së ardhmes, duke mos qenë asnjëherë te vetmuar”.