Histori tragjike: Vite më parë i kishte vdekur burri, vajza tetëvjeçare i vdes nën rrënoja, vetë humb jetën në spital

30 vjeçarja Diena Meçe, që u nxor e gjallë tek pallati gjashtëkatësh në Durrës, fatkeqësisht humbi jetën në spital.

Ajo u bë viktima e katërt në Durrës që ndërroi jetë si pasojë e tërmetit të fuqishëm më magnitudë 6.4 shkallë të Rihterit.

Por, fatkeqësia shkon përtej kësaj. Ajo kishte humbur më herët edhe vajzën e saj tetëvjeçare nën rrënojat e tërmetit.

Më herët policia kishte njoftuar se “pas shkollës së “Mjeshtërisë” në rrënojat e një pallati gjashtëkatësh, pas 14 orë përpjekjesh, Forcat Speciale Renea bënë të mundur nxjerrjen e 30 vjeçares e cila është dërguar menjëherë në spital për ndihmë mjekësore. Rreth dy orë më parë, Renea nxori edhe vajzen e saj të mitur tetëvjeçare e cila kishte humbur jetën”.

Diena më parë kishte humbur bashkëshortin, ndërsa sot humbi vajzën dhe pastaj ajo u nda edhe vetë nga jeta.

Në vitin 2015 në një mesazh dedikuar bashkëshortit të saj që kish ndërruar jetë, ajo shkruante:

“Mendoja gjithmone qe zoti me kishte dhene shume lumturi,duke pasur nje shok e nje bashkeshort si Dori im, por jeta qenka nje sprove e vertete. Me mungon shume bebi im”./ Top Channel