Interneti mbushi plot 50 vjeç

Ishte data 29 tetor 1969 kur një pako e vogël të dhënash transmetohej nga universiteti UCLA i Los Angelesit, në institutin e kërkimeve Stanford.

Informacionet, që udhëtonin me një shpejtësi 50 kbps, rreth 2700 herë më ngadalë në krahasim me sot, në rrjetin e transmetimit Arpanet, projektuar nga departamenti amerikan i mbrojtjes, përfaqësojnë hapin e parë të procesit që çoi në krijimin e internetit modern.

Agjencia për projektet e kërkimit të avancuar të departamentit të mbrojtjes, kishte një sistem komunikimi që bashkonte vetëm katër terminale dhe ajo konsiderohet paraardhësja e sistemit të internetit. Transmetimi i parë, duhej të mbante fjalën login, por sistemi pësoi një crash dhe në destinacion mbërritën vetëm dy shkronjat e para.

Kërkuesi vizionar i Cernit, Tim Berners Lee, ëndërronte të mund të organizonte të gjitha informacionet që qarkullonin në laboratorin në gjenevë në një rrjet. Ideja ishte revolucionare; ai filloi punën në 1989 por vetëm në 1991 mundi të prezantonte para botës, World Wide Web bazuar në një gjuhë të re programimi, html, që përmes adresave të sakta, url, lejonte magazinimin e informacioneve në brendësi të një arkivi gjigand virtual.

U desh të pritej deri në 1993 që Cern të vendoste ta bënte të disponueshëm protokollin e World Wide Webit falas, shkruan TCh. Në 2013, me rastin e përvjetorit të 20 të këtij eventi, qendra hapi edhe sajtin e parë të saj online të projektuar ndonjëherë që mban informacione bazë mbi funksionimin e rrjetit dhe mbi protokollin për hipertekstin Http.

Sot, në rrjet mund të numërohen rreth 1.7 miliardë sajte webi. Informacione, rrjet social, tregti elektronike; në vetëm 50 vite nga lindja e tij, edhe pse në formë të ndryshme, interneti ka rezultuar një instrument revolucionar pa të cilin nuk mund të bëjmë më.